Հասարակություն

40-ամյա տղամարդը հրկիզել է Ավանում գտնվող «Իռեն» գեղեցկության սրահը.

Երևանի ընդհանուր իրավասության դատարանի՝ Շենգավիթ վարչական շրջանում գտնվող նստավայրում Աննա Դանիբեկյանի նախագահությամբ ավարտվել է Վահե Բ.-ի գործի դատական քննությունը:

Դեպքի պահին Վահե Բ.-ն 40 տարեկան էր, ամուսնացած, նրա խնամքին էին մինչև 14 տարեկան 2 երեխաները՝ 10 և 3 տարեկան:

Նրան մեղադրանք էր առաջադրվել ուրիշի գույքը հրկիզման եղանակով վնասելու համար՝ ՀՀ քրեական օրենսգրքի 185 հոդվածի 2-րդ մասի 1-ին, 2-րդ մասերով:

Ըստ մեղադրանքի՝ Վահե Բ.-ն հարաբերությունները խզելով նախկին ընկերուհու հետ ու կարծելով, թե նրա աշխատավայր «Իռեն» գեղեցկության սրահը պատկանում է նրան, սրահի գույքը վնասելու դիտավորությամբ                2018 թվականի հունվարի 17-ի գիշերը՝ ժամը 3-ն անց 30-ին, Երևանի Երրորդ մասից տաքսիով հասել է Ավան վարչական շրջան, «Իռեն» գեղեցկության սրահից որոշ հեռավորության վրա մեքենան կանգնեցրել, վարորդին պատվիրել է սպասել իրեն, գնացել է գեղեցկության սրահի մոտ: Ժամը 4-ն անց  5 րոպեին Վահե Բ.-ն, ըստ մեղադրանքի, քարով ջարդել է սրահի պատուհանի ապակին, այրել է նախապես իր հետ վերցրած պոլիմերային տարայով վերցրած բենզինը ու տարան պատուհանից նետել է սրահի ներսը: Գեղեցկության սրահի ներսում հրդեհ է բռնկվել, վնասվել է սրահի գույքը, և սրահի տիրուհուն պատճառվել է ընդհանուրը խոշոր չափի՝ 1 միլիոն 336 հազար 750 դրամի գույքային վնաս:

Որպես Վահե Բ.-ի խափանման միջոց ընտրվել էր կալանավորումը, դատարանը կիրառել էր այլընտրանքային խափանման միջոց՝ գրավ:

Դատարանում Վահե Բ.-ն իրեն լիովին մեղավոր է ճանաչել, հրաժարվել է ցուցմունքներ տալուց:

Դատարանում հետազոտվել է Վահեի նախաքննական ցուցմունքը, որտեղ նա հայտնել է, թե ծանոթացել ու մտերմացել էր մի աղջկա հետ, որն աշխատում էր «Իռեն» գեղեցկության սրահում: Ընկերուհին ասել է, թե գեղեցկության սրահի ոչ թե պարզապես աշխատողը, այլ  տերն է: Ինքը հավատացել է նրան:

Որոշ ժամանակ շփվելուց հետո աղջիկը խզել է իրենց հարաբերությունները, իր կարծիքով՝ պատճառն այն էր, որ այդ աղջիկը սկսել էր շփվել մեկ ուրիշի հետ: Ինքը աղջկա հեռանալուց հետո պարբերաբար մտածում էր նրա մասին, մտքում նրան էր  մեղադրում իրենց հարաբերությունների խզման համար:

2018 թվականի հունվարի 17-ի կեսգիշերին, երբ ինքը Երրորդ մասում՝ իր տատիկի տանն էր, սկսել է մտածել իրենից հեռացած աղջկա մասին, հիշել է իրենց մտերմության օրերը ու որոշել է «ցավ պատճառել նրան»: Որոշել է այրել իր կարծիքով՝ աղջկան պատկանող «Իռեն» գեղեցկության սրահը:

Որոշել ու անմիջապես քայլեր է ձեռնարկել որոշումն իրականացնելու համար: Գիշերվա ժամը 3 -ն անց 30-ի սահմաններում դուրս է եկել տատիկի տանից, գնացել է նկուղ, վերցրել է բենզինով լի պլաստիկե տարան, դրել է տոպրակի մեջ, դուրս է եկել փողոց ու պատահական տաքսիով մեկնել է Ավան: Գեղեցկության սրահին չհասած՝ պահանջել է, որ տաքսին կանգնի: Վերցրել է իր տոպրակը՝ բենզինով տարան մեջը, վարորդին պատվիրել է սպասել, իսկ ինքը գնացել է դեպի գեղեցկության սրահ: Սրահին հասնելով՝ գետնից մի քար է վերցրել, հարվածել ու ջարդել է գեղեցկության սրահի պատուհանի ապակին, ապա կրակայրիչով այրել է բենզինով լի տարան ու այն պատուհանից նետել է սրահի ներսը: Սրահը սկսել է այրվել: Նետելու ընթացքում բենզին է լցվել իր աջ ձեռքին, այրվել են իր բաճկոնի թևքը ու աջ ձեռքի դաստակը:

Սրահը հրկիզելուց հետո ինքը վազելով գնացել, նստել է իրեն սպասող տաքսին ու վերադարձել է Երրորդ մաս՝ տատիկի տուն:

Երեք օր հետո՝ հունվարի 20-ին ինքը կամովին ներկայացել է ոստիկանություն ու խոստովանել է, որ ինքն է հրկիզել գեղեցկության սրահը:

Ինքը դեպքից հետո է իմացել, որ ծանոթ աղջիկը խաբել էր՝ գեղեցկության սրահը նրան չէր պատկանում, այլ ուրիշ կնոջ: Ինքը հանդիպել է սրահի իրական տիրոջը, տեղեկացրել է, որ «թյուրիմացություն է տեղի ունեցել», և փոխհատուցել է պատճառած ամբողջ վնասը: Զղջացել է կատարածի համար…

Հրկիզված գեղեցկության սրահի իրական տիրուհին՝ գործով տուժողը, հայտնել է, որ դեպքի երեկոյան սրահի աշխատողները ռեստորանում նշել են իրենց գործընկերուհու ծննդյան օրը, ինքը տուն է վերադարձել կեսգիշերից հետո ու քնել է: Գիշերվա ժամը 4-ն անց 5րոպեին իր հեռախոսին զանգ է եկել գեղեցկության սրահի հակաառևանգման համակարգի միանալու պատճառով: Արթնացրել է ամուսնուն, գնացել են սրահի մոտ, տեսել են, որ պատուհանը ջարդված է, սրահը՝ հրդեհված: Հրդեհը մարվել է հրշեջ ծառայության կողմից: Դեպքից հետո սրահ է եկել մի տղամարդ՝ Վահե անունով, ասել է, թե ինքն է այրել սրահը՝ սխալմամբ մտածելով, թե այն պատկանում է նախկին ընկերուհուն, բայց իմանալով, որ սրահը նրանը չէր, զղջացել է: Այդ տղամարդը լրիվ փոխհատուցել է պատճառած վնասը, ինքը բողոք կամ պահանջ չունի:

Դատարանը Վահե Բ.-ին մեղավոր է ճանաչել ՀՀ քրեական օրենսգրքի 185 հոդվածի 2-րդ մասի 1-ին, 2-րդ մասերով, դատապարտել է 1 տարի ազատազրկման, կիրառել է պայմանական դատապարտություն և սահմանել է փորձաշրջան 1տարի ժամկետով:

Վահե Բ.-ից հօգուտ պետբյուջեի՝ կբռնագանձվի  562 հազար 400 դրամ՝ որպես դատական ծախսերի հատուցում:

Նյութի աղբյուր1in.am

Կարդացեք նաեվ

Վարչապետի տիկնոջ արձագանքը այն «լուրի» վերաբերյալ , համաձայն որի ՝ Նիկոլ Փաշինյանն ու Աննա Հակոբյանը 3 միլիոն դոլարով տուն են գնել Կանադայում

Irina Abovyan

Մեքենան դուրս է եկել ճանապարհի երթևեկելի հատվածից և գլխիվայր շրջվել

Irina Abovyan

Նոր մանրամասներ՝ Կոտայքի մարզում տեղի ունեցած խոշոր ու ողբերգական ավտովթարից. պարզվել է՝ BMW-ի վարորդը եղել է խմած և ավտոմեքենա վարելու իրավունք չի ունեցել. ՖՈՏՈՌԵՊՈՐՏԱԺ, ՏԵՍԱՆՅՈՒԹ

Irina Abovyan

Ադրբեջանի մտահոգությունը հասկանալի է, որովհետեւ համապատասխան գործողություններ են իրականացվելու. Դավիթ Տոնոյան (տեսանյութ)

Irina Abovyan

Վանաձոր քաղաքի 30-ամյա բնակիչը կալանավորվել է՝ խոշոր չափերով շորթում և խուլիգանություն կատարելու համար

Irina Abovyan

Yandex.Taxi-ն կորոնավիրուսից տուժած վարորդներին ֆինանսական աջակցություն ցուցաբերելու համար հիմնադրամ է գործարկում Հայաստանում

Irina Abovyan